Прысвячэнне Украіны
Беззаганнаму Сэрцу Марыі

Зварот да духавенства, манаства і свецкіх
Рымска-Каталіцкага Касцёла Украіны

“Апошнія драматычныя падзеі ў нашай дзяржаве у чарговы раз заахвочваюць нас звярнуцца да ўсіх хрысціянаў з заклікам духоўна падтрымліваць Украіну ў яе змаганні жыць у праўдзе, ствараць цывілізаванае грамадства, заснаванае на высокіх духоўных і маральных каштоўнасцях.

Мы, хрысціяне, цвёрда верым, што жыццё згодна з Божымі прыказаннямі з’яўляецца падставай грамадскага ладу, бяспекі і гарантам ўсебаковага развіцця дзяржавы. Пагроза супакою ва Украіне з’яўляецца для вызнаўцаў Хрыста свайго роду заклікам да таго, каб звярнуцца да Бога. Наш зварот, малітва аб супакоі ў кожным чалавечым сэрцы, пост, міласціна, учынкі міласэрнасці могуць шмат змяніць, як у жыцці кожнага з нас, так і ва Украіне, жыхарамі якой мы з’яўляемся. Таму прашу кожнага з Вас учыніць як мага больш намаганняў для таго, каб ва Украіне, пачынаючы з нас саміх, адбыліся глыбокія перамены да лепшага.

Верачы ў матчыную апеку Найсвяцейшай Панны Марыі, Маці Божай і Маці ўсяго чалавечага роду, звяртаючы ўвагу на Фацімскае пасланне, Канферэнцыя Рымска-Каталіцкіх Біскупаў Украіны 20 сакавіка 2014 года на заканчэнне свайго 43 Пленарнага Паседжання прысвеціць Беззаганнаму Сэрцу Панны Марыі ўсю Украіну і тых, каму пагражаюць ваенныя дзеянні. У гэтым Акце просім Беззаганна Зачатую абараніць нас ад злога, аб супакоі і дары жыцця ў асвячаючай ласцы для ўкраінскага народу і ўсіх людзей добрай волі.

Для таго, каб гэты акт быў малітвай ўсяго Касцёла ва Украіне просім, каб у нядзелю 23 сакавіка на заканчэнне кожнай Святой Імшы вернікі разам са святарамі даверыліся апецы Божай словамі гэтага ж Акту прысвячэння Украіны Беззаганнаму Сэрцу Панны Марыі” (Львоў , 17 сак 2014 г. Канферэнцыя Рымска – Каталіцкіх Біскупаў Украіны).

АКТ ПРЫСВЯЧЭННЯ УКРАІНЫ
БЕЗЗАГАННАМУ СЭРЦУ МАРЫІ

Любая Валадарка і Маці нашая, Каралева святога Ружанца, Успамога хрысціянаў, Выратаванне чалавечага роду, Магутная Дзева, вось мы пакорна стаім перад Тваім тронам.

Мы прыходзім з цалкавітым даверам, што вымалім міласэрнасць, атрымаем ласку і неабходную дапамогу і абарону ў нашых няшчасцях. Просім аб гэтым не дзеля нашых заслугаў, на якія мы не разлічваем, але дзеля бясконцай дабрыні Твайго мацярынскага Сэрца. Табе, Марыя, Твайму Беззаганнаму Сэрцу мы аддаем і прысвячаем сябе ў гэтую драматычную гадзіну гісторыі чалавецтва і гісторыі Украіны.

Злучаемся з усім святым Касцёлам, містычным Целам Твайго Боскага Сына, якое пакутуе і сыходзіць крывёй у столькіх месцах ва ўсім свеце. Злучаемся з усімі людзьмі, якія ў шматлікіх кутках свету пакутуюць з-за вайны, нянавісці і несправядлівасці, з тымі усімі, хто пакутуе, бо не спазнаў любові Божай. Асаблівым чынам злучаемся з народам Божым, даручаным нашай апецы на Украінскай зямлі, і ўсімі, хто жыве на гэтай зямлі.

Няхай крануць Цябе пакуты столькіх людзей. Мы ўсведамляем, што яны выкліканы грахом. Народ зямлі ўкраінскай невыказна пакутаваў з-за шматлікіх грахоў іншых людзей, а таксама з-за свіх ўласных. Таксама і цяпер зло і грэх, здаецца, пануюць у сэрцах столькіх сучаснікаў таксама і на нашай зямлі. Грахі абортаў, п’янства, карупцыі, разводаў, нянавісці, хлусні, гвалту, прагнасці, распусты, несправядлівасці, пагарджання слабымі і беднымі – іх так шмат! Многія людзі адкінулі Бога ці жывуць так, нібы Яго няма, нібы Ён не Любоў. Таксама і на нас саміх цяжараць віна і грэх .

О Маці міласэрнасці, выпрасі нам у Бога ласку міласэрнасці і прабачэння! Выпрасі ласку навяртання і хрысціянскага жыцця. Вымалі дар хрысціянскага прымірэння на зямлі ўкраінскай. Выпрасі для нас перш за ўсё тыя ласкі, якія ў адно імгненне могуць змяніць чалавечыя сэрцы і якія падрыхтуюць і ўмацуюць упрагнёны супакой! Валадарка свету, маліся за нас і абдары свет і нашу Украіну супакоем, пабудаваным на праўдзе, справядлівасці і Хрыстовай любові! А асабліва прынясі нам у дары супакой духоўны, каб Валадарства Божае магло расці ў супакоі і згодзе.

Не адмаўляй у сваёй апецы няверуючым і ўсім тым, хто знаходзіцца ў ценю смерці. Зрабі, каб і для іх ўзышло сонца праўды! Зрабі так, каб разам з намі яны паўтаралі перад адзіным Збаўцам гэтыя словы: Хвала на вышынях Богу, а на зямлі супакой людзям добрай волі! Выпрасі нам адвагу абвяшчаць усім Евангелле Твайго Боскага Сына.

Пакорліва просім ў Цябе ласку адзінства паміж усімі, хто прызнае Сына Твайго як свайго Збаўцу, каб настала адна аўчарня і адзін пастыр. Таксама пакорліва прысвячаем Табе, любая Маці і Каралева, Расію, якая займае асаблівае месца ў Тваім Беззаганным Сэрцы. Агарні яе сваёй мацярынскай апекай.

Абдары святы Касцёл Божы супакоем і вольнасцю; стрымай хвалі новага паганства і матэрыялізму, умацуй у сэрцах вернікаў любоў да чысціні, практыкавання хрысціянскага жыцця і апостальскай дзейнасці, каб магла памнажацца колькасць слугаў Божых і іх заслугі.

Як некалі Сэрцу Твайго Боскага Сына былі прысвечаны Касцёл і ўсё чалавецтва, якое ў Ім пакладае сваю надзею, што Ён стане для ўсіх невычэрпнай крыніцай перамогі і выратавання, – так і мы прысвячаем сябе назаўжды Табе і Твайму Беззаганнаму Сэрцу, о Маці і Каралева наша, каб Ваша любоў і апека забяспечылі перамогу Валадарства Божага, каб наша Украіна і ўсе народы, паяднаныя паміж сабой і з Богам, бласлаўлялі Цябе і праслаўлялі.

Канферэнцыя
Рымска – Каталіцкіх Біскупаў Украіны

Акт прысвячэння Беларусі
Беззаганнаму Сэрцу Найсвяцейшай Панны Марыі
падчас святкавання юбілею 400-годдзя прыбыцця цудатворнага абраза Маці Божай у Будслаў

Будслаў, 6 ліпеня 2013 г.

О велічная і ласкавая Маці Божая Будслаўская, наша Валадарка!

Сёння, калі прамінула чатыры стагоддзі з моманту Твайго прыбыцця ў гэтае святое месца, мы як Твае духоўныя дзеці ў гэтым Годзе веры стаім перад Табою з удзячнасцю за прыклад жывой веры, надзеі і любові, за апеку над намі і за выпрашаны ў Бога дар свабоды веравызнання. Стаім з пачуццём віны за грахі нашага народа і за нашыя асабістыя правіны. Мы ўсведамляем, як моцна нам патрэбна пакаянне за іх, за парушэнне абяцанняў, дадзеных падчас хросту, за адыход ад веры, і просім прабачэння ў міласэрнага Бога і бліжніх.

Маці нашай веры, Маці міласэрнасці і суцяшэння, Пасрэдніца ўсіх ласкаў, мы стаім перад Табою ў гэты складаны час, напоўнены небяспечнымі выклікамі. Стаім з бязмежным даверам і надзеяй, што Ты, наша нябесная Матуля, і надалей выслухаеш нас і дапаможаш, як гэта было на працягу мінулых чатырох стагоддзяў.

Да Твайго трону мы прыносім незлічоныя ахвяры мучанікаў за веру, яе сведкаў і вызнаўцаў. Табе, наша Валадарка і Апякунка, ахвяруем і даручаем саміх сябе і ўсё, што маем: нашу Айчыну — сінявокую Беларусь, наш народ і ўсе яго справы, Касцёл, які адраджаецца і развіваецца, сем’і, народжаных і не народжаных яшчэ дзяцей, моладзь, хворых, церпячых; ахвяруем і давяраем Табе нашы думкі і клопаты, кожнае біццё нашых сэрцаў і кожны парыў волі.

Пакорна просім міласэрнасці і дапамогі, каб мы заўсёды заставаліся вернымі Богу, Касцёлу, Крыжу, Евангеллю і Бацькаўшчыне.

Памятай, спагадлівая і ласкавая Пані, пра свой народ, які прысвячае сябе Твайму Беззаганнаму Сэрцу. Узглянь на яго сваім міласэрным позіркам і выслухай.

Абп.: Маці Божая! Абяцаем учыніць усё дзеля таго, каб наша Айчына была сапраўдным Валадарствам Тваім і Твайго Сына Езуса Хрыста, каб яна знаходзілася пад Тваім панаваннем і апекаю ў асабістым, сямейным, нацыянальным і грамадскім жыцці ўсіх яе жыхароў.