Фацімскі ружанец



Шмат разоў з нагоды фацімскіх урачыстасцяў у розных парафіях мы чулі пра фацімскі ружанец. Пра які ж ружанец тут ідзе гаворка? Ці гэта нейкая іншая форма малітвы ружанцовай; ці ён павінен быць узбагачаны нейкімі іншымі малітвамі? А можа тут ідзе гаворка пра тое, як ўрачаста моляцца падчас фацімскіх набажэнстваў? Што азначае выраз “фацімскі ружанец”?
Па-першае: фацімскі ружанец – гэта штодзённы ружанец! Гэта не хвілёвыя парывы, гэта не забава, гэта не ўмова Богу, што тыдзень я прашу, а потым чакаю цуду. Фацімскі ружанец – гэта штодзённая, вытрывалая, верная малітва; незалежна ад таго, якія цяпер дні: цяжкія ці лёгкія. Але гэта яшчэ не ўсё.
Па-другое: мы павінны звярнуць увагу на умову, якая датычыцца інтэнцыі, у якой мы молімся на ружанцы. Маці Божая просіць маліцца за грэшнікаў, аб іх навяртанні. Фацімскі ружанец адкрывае нас на патрэбы іншых, выводзіць нас з кола нашага эгізму, вучыць сапраўднай любові да бліжняга, а нават больш, заклікае да любові да непрыяцеляў. Свет – гэта не толькі я, але яшчэ мае браты і сёстры, таму, каб змяніць аблічча свету, я не магу ў малітве думаць толькі пра сябе, толькі пра мае асабістыя справы і клопаты. Каб пра гэта не забыцца, мы паўтараем пасля кожнага дзесятка малітву:

“О мой Езу, прабач нам грахі нашы, захавай нас ад агню пякельнага, прывядзі ўсе душы да неба і дапамажы асабліва тым, каму найбольш патрэбна твая міласэрнасць”.

Наша малітва у гэтым выпадку павінна быць бескарыслівай настолькі, каб нават не абмяжоўваць нашай інтэнцыі за блізкіх нам людзей, якіх мы ведаем асабіста. Ружанцам мы апляцем увесь свет, даручым гэтай малітве ўсіх, хто знаходзіцца ў няволі граху і каму пагражае вечнае асуджэнне. Будзьма, як фацімскія дзеці, якія маліліся за Расію, і хоць не мелі нават уяўлення, што гэта такое, а толькі дапускалі, што гэта можа быць нейкая “грэшная спадарыня”, аднак, не стамляліся ў малітве, просячы аб навяртанні толькі таму, што аб гэтым прасіла Маці Божая.
Ружанец павінен быць нашай штодзённай малітвай; нават больш, нам нельга забыць пра інтэнцы, а менавіта прасіць аб навяртанні грэшінкаў. Калі мы добра зразумелі словы Маці Божай, падумаем над тым, каб зрабіць наступны крок і адказаць на просьбу Марыі наконт ружанца, узнагароджваючага Яе Беззаганнаму Сэрцу ў першыя суботы месяца. Молячыся на ружанцы, падумай, можа надышоў ужо час зрабіць больш, пачаць практыкаваць таксама набажэнства да Беззаганнага Сэрца Марыі, набажэнства, якое павінна змяніць аблічча свету.